DAVAO CITY – Nakatala ang Police Regional Office XI ug 31 porsyento nga pag-ubos sa ihap sa weekly crime incidents sa unang tulo ka bulan ning tuig kasamtangan kung itandi sa susama nga panahon sa 2018.
Base sa report ni Brig. Gen Marcelo C. Morales, police regional director, subay sa statistics nga ilang nahipus gikan sa police blotters sa tibuok rehiyon, mukabat sumala pa sa 42 ang crime volume gikan sa Marso 25-31, 2019.
Sa walo ka klase sa krimen, ang physical injury ang nag-una sa listahan nga adunay napulo ka insidente.
Ikaduha ang pagpangawat nga adunay siyam, robbery nga adunay pito, murder nga adunay lima, rape nga adunay lima, duruha ka homicides ug upat ka insidente sa pagpangawat ug motorsiklo. Wala sab sumala pay gika-report nga kaso sa carnapping.
Gitataw ni Morales nga dakong tabang sumala pa niini ang proactive strategies, suporta gikan sa komunidad, ug hugtanon nga pagpatuman sa kapulisan sa local ordinances inubanan sa Oplan Dabaw Kalinaw sa rehiyon ug uban pang anti-criminality campaign.
Nakatabang sab sumala pa ang gipatuman nga checkpoint ug chokepoint.
