Dili prayoridad sa Senado ang pag-apruba sa kontrobersyal nga Divorce ug Death Penalty Bills, lakip ang charter change, matod pa ni Senate President Francis Escudero.
Apan giklaro usab sa Senador nga magpadayon ang pagdungog sa nahisgutang mga balaudnon ug mo-agi ang mga nahisgutan sa normal nga proseso.
Mas hatagan kuno ug pagtagad ang mga balaudnon nga muhatod ug direktang benepisyo sa publiko, Likayan usab kuno ang mga balaudnon nga muhatag ug pagkabungkag ug panagbikil sa politika.
Samtang gikwestyon usab niini kung nganong adunay mga balaod nga nagpagaan sa pas-anon sa mga dagkong negosyo, lakip na ang pagpadali sa pagbayad ug tax ug utang apan walay balaod nga mupadali sa pagpangita ug trabaho.
Bisan paman sa mga balaod nga makatabang sa mga dagkong negosyante, walay balaod ang mupagaan sa commuting, connecting ug balaod nga mupadali sa pagtapos sa pagtungha ug pagpangita ug trabaho.
Giseguro usab ni Senador Escudero nga mas hatagan ug pagtagad sa Senado ang pag-apruba ug mga balaod nga magpaayo sa kinabuhi sa mga Pilipino.
