DAVAO CITY – Nalunop sa baha ang mga dapit sa Brgy. Bunawan, ning dakbayan, human sa walay puas nga pag-ulan nga nagresulta sa gikatahong abot hawak nga pagsaka sa lebel sa tubig sa Bunawan River kagahapon, Enero 16.
Daghanang pamilya sab ang gipahikling sa evacuation center sa Bunawan Gym partikular na kadtong mga pamilya nga gikan sa Purok 2-A, Inabangga.
Anaa sa 69 ka mga pamilya o 143 ka mga indibidual ang temporaryong nagpundo sa evacuation center sa lugar.
Gawas sa Bunawan River, namatikdan sab ang pagsaka sa tubig sa Talomo River ug Davao River sa Brgy. Tamugan, ning dakbayan.
Sa pagpanubay sa Davao City Disaster Risk Reduction and Management Office, anaa sa karon sa Code Orange kon warning level ang sapa sa Bunawan apan nag-anam anam kini sa paghubas.
Nunot sa mga pag-ulan, daghanang Dabawenyo ang nagdahum alang sa sayo nga pagpagawas og class and work suspension sa Davao City LGU.
Apan pagpaklaro sa Davao City Disaster Risk Reduction and Management Office, naghulat lamang sila sa mamahimong rekomendasyon sa Chief Executive o ang Mayor nga adunay gahum sa pagsuspinde sa klase base sab sa gihatag nga taho sa PAGASA.
Gikonsidera sab sa opisina ang land area sa Davao City nga dunay mga lugar nga dili makasinati og pag-ulan maong dili basta-basta makasuspinde sa klase ug trabaho ang dakbayan gumikan sa mamahimong epekto niini sa ekonomiya.
Hinuon, pipila lamang ka mga barangay ang makasuspinde sa klase gumikan sa dili maayong lakat sa panahon.
Nagpagawas og Sea Travel Advisory ang Coast Guard District Southeastern Mindanao mahitungod sa pagsuspinde sa operasyon sa mga motor banca nga naga-operate sa may SIR Matina gikan Gravahan patabok sa Bankerohan ug Sandawa patabok sa Magallanes, ning dakbayan gumikan sa pagbaha nga epekto sa shear line.
Tungod niini, dili una makalarga ang mga sakayan pandagat sa naasoy nga dapit alang sab sa kaluwasan sa mga bangkero.
