DAVAO CITY – Bisan nga nakadawat ug daghanan reaksiyon sa mga netizens ingon man sa mga miyembro sa City Council ang pag-adto sa Sangguniang Panlungsod ni Vice presidential aspirant Walden Bello, gikanayon ni Acting City Mayor Sebastian “Baste” Duterte nga ang gihimo sumala pa sa nahisgutan mao ang pagpangita lamang ug atensiyon human nga pakyas kini sa iyang pagpangampanya.
Kahinumduman nga nagpost ug hulagway si Bello nga naglingkod sa vice mayor’s chair sulod sa City Council Session Hall diin gikanayon sa mga konsehal nga usa kini ka pagpanginsulto ug kawad-on ug respeto dili lamang sa legislative body apan sa tanan nga mga Dabawenyos.
Ayha sumala pa misulod sa Sangguniang Panlungsod (SP) building, gibutyag sumala pa sa nahisgutan nga gusto niya nga muadto sa session hall arun mokuha ug kopya sa nahimong desisyon sa Council nga nag-deklara kaniya isip persona non grata.
Human nakasulod sa session, gitambagan ang mga nahisgutan sa SP security nga mubiya na sa bisinidad.
Nasayran sab nga si Bello ug mga kaubanan niini ang misulod sa City Council session hall nga walay igong koordinasyon.
Sumala pa kang konsehal Jay Quitain, Jr., City Council majority floor leader, nagpapansin lamang si Bello gumikan kay nagpapili kini sa taas nga posisyon diin inay nga makadawat hinuon kini ug mga negatibo nga reaksiyon.
Ang pagka-arogante sumala pa sa nahisgutan ang hinungdan nganong giduso ang resolution nga nagdeklara kaniya ug persona non grata.
Samtang gikanayon sab ni Baste nga mas daghanan pang mga mahinungdanon nga butang ang kinahanglan hatagan ug pagtagad ilabi na nga temporaryo siya nga mihulip sa katungdanan sa iyang igsuon nga si Mayor Sara Duterte-Carpio kinsa okupado karun sa pagpangampanya.
