DAVAO CITY – Gikatakdang manguna sa inagurasyon sa unang segment sa Davao City Coastal Road sila Pangulong Ferdinand “Bongbong” Marcos, Jr. ug Vice President Sara Duterte karong adlawa, Hulyo 1.
Sumala sa Department of Public Works and Highways-XI, karong alas-10 sa buntag magsugod ang programa ug paghuman niana ang pormal nga pag-abli sa Tulip Drive – Bago Aplaya segment sa maong coastal road ngadto sa katawhan ug mga motorista bandang alas-12 sa udto.
Pagasalmutan sab kini nila kanhi Pangulong Rodrigo Duterte ug Davao City Mayor Sebastian Duterte. Sumala sa Davao City Police Office, anaa sa lapas usa ka libo ug dos syentos ka mga security personnel ang ipakatag atol sa inagurasyon. Nagsugod ang pagtukod sa Coastal Road ubos sa administrasyon ni kanhi Pangulong Rodrigo Duterte ubos sa “Build, Build, Build” program.
Namuhunan ang gobyerno og P10.317 bilyon alangsa Tulip Drive-Bago Aplaya segment, nga giablihan niadtong Enero 2022. Tumong sa maong proyekto nga mapalambo ang suburban development ug decongestion sa mga sakyanan sa sentro sa siyudad.
Kabahin kini sa proyekto sa Infrastructure Modernization for Davao, nga nagtumong sa pagpalig-on sa road network sa dakbayan aron matubag ang panginahanglanon sa trapiko.
Ang coastal road magsilbi nga bypass o alternatibong rota paingon sa Davao-Cotabato Road, ingon man makapamenos sa hasol sa paglatas paingon Matina Junction, Bangkal Junction, ug Ulas Junction.
Sumala sa DPWH 11, anaa sa 94.88% ang completion rate gikan Davao-Cotabato Road paingon sa Santa Ana Wharf ug R. Castillo diin adunay kinatibuk-ang alokasyon sa badyet nga mibalor sa P24.551 bilyon.
Ang pagkompleto sa Davao City Coastal Bypass Road gilauman nga makahatag og kalambuan sa ekonomiya ug turismo, nga naghimo niini nga usa ka mapuslanon nga puhunan alang sa umaabot.
Duna sab talagasaon nga istruktura ang maong highway nga adunay composite structure, nagsilbi sa daghang mga katuyoan sama sa coastal shore protection, ug breakwater.
via || Bombo LJF
