DAVAO CITY – Aprubado na sa Konseho ning siyudad ang P7.8 million assistance nga gisugyot ni Mayor Inday Sara Duterte aron nga itabang sa mga areas sa Luzon nga apektado sa bagyong Tisoy (Kumumuri).
Sumala pa kang Mayor Inday ang nahisgutan nga assistance gikan sa humanitarian aid sa dakbayan, usa ka tradisyon nga naandam sa siyudad aron nga tabangan ang mga areas nga apektado sa bisan unsa man nga kalamidad ug makabangon ang mga nahisgutan pinaagi sa relief operations.
Gitataw sa Mayor nga mapasalamaton ang dakbayan sa Davao gumikan kay talagsa lamang nga makasinate og kalamidad hinungdan nga mamahimong makahatag og hinabang ang lokal nga panggamhanan pinaagi sa relief operations.
Nasayran sa Mayor nga ang disaster funds mamahimo lamang nga gamiton panahon sa kalamidad.
Tungod kay dili magamit sa siyudad ang maong pundo, mas maayo itabang na lamang kini sa mga lugar nga apektado sa mga kalamidad.
Gikanayong sa P7.8 million, ihatag sa dakbayan ang tig-P1 million sa probinsiya sa Northern Samar, Occidental Mindoro, Oriental Mindoro, Camarines Sur, Sorsogon, Catanduanes, ug Albay; P500,000 Calbayog City sa Samar; ug P300,000 sa Arteche sa Eastern Samar.
Sukad bulan sa Enero, nakahatag na ang siyudad og P94.4 million sa mga lugar nga apektado sa kalamidad.
Ang nahisgutan nga kantidad gikan sa Quick Response Fund (QRF) diin 30 percent kini sa disaster funds.
Sa kasamtangan adunay nahibilin nga pundo ang siyudad nga P36.5 million sa QRF ayha matapos ang kasamtangan nga tuig.
