Mitagana og pondo nga P600 milyon alang sa Lingap para sa Mahirap Program karong tuig ang Gobyerno ning Dakbayan sa Davao, usa ka dakong pagtaas gikan sa P400 milyon nga budget atong 2024.
Sumala pa ni Ytalia Bohol, Officer-In-Charge sa Lingap Program, nga ang pagtaas sa pondo nagtinguha nga matabangan ang nagkadako nga ihap sa mga kliyente nga ginaserbisyohan sa programa.
Gibutyag usab niini, nga sa milabayng tuig ang programa nakatabang og 188,472 ka tawo, nga adunay average nga 700 hangtod 800 ka kliyente nga ginaserbisyohan matag adlaw sa Lingap Main Office ug sa mga satellite offices.
Sumala pa niini, nga ang kadaghanan sa mga nangayo og tabang mao ang mga pasyente nga nagkinahanglan og medisina, ilabi na ang mga pasyente nga gikan sa Animal Bite Treatment Center ug City Health Office nga nanginahanglan og anti-rabies vaccine.
Dugang pa sa opisyal, nga ang Lingap para sa Mahirap usa sa mga programa sa siyudad nga nagtinguha sa pagtabang sa mga kabus nga Dabawenyos sa ilang gasto sa lubong, medical bills, medisina, dialysis, ug laboratory fees.
Ginatagaan usab sumala pa og prayoridad ang mga pasyente nga adunay cancer, nga makadawat og tabang matag bulan alang sa chemotherapy ug mga medisina.
Sumala pa ni Bohol, nga ang programa nagserbisyo sa mga kliyente gikan sa public ug private hospitals, diin 42 ka private hospitals sa Davao City ug tulo ka botika ang accredited.
Aron sumala pa nga mag-aplikar sa tabang, kinahanglan mag-submit ang mga kliyente og mga kinahanglanon nga dokumento susama sa final medical bills, medical certificates, prescriptions, ug barangay certifications.
Matud pa niini, nga ang funeral assistance naglangkob sa tabang alang sa lungon, venue sa lamay, ug embalming apan dili na lakip niini ang gasto sa paglubong.
Ang Lingap adunay mga satellite offices sa Calinan, Marilog, Toril, Bunawan, Paquibato, ug sa Almendras Gymnasium compound.
