DAVAO CITY – Gi-aprubahan sa 19th City Council sa Davao ang mikabat sa P50 million isip tabang pinansyal sa upat ka mga barangay nga naapektohan sa dako ug grabeng pagbaha sa Davao City kagabii, samtang usa ka milyon sab ang gigahin alang sa Ilocos Norte nga gipailalum sab sa State of Calamity gumikan sa bagyong Ineng.
Ang upat ka mga barangay sa Davao nga grabeng naapektohan sa lapad nga mga pagbaha gilakipan sa Tugbok, Los Amigos, Wangan ug Talomo.
Una nang nasayran nga miabot sa 3,559 ka mga pamilya o 17,795 ka tao ang apektado sa nahisgutang baha.
Karong adlawa, gipahigayon ang usa ka special session sa Davao 19th City Council ug gihisgutan ang mga tabang alang sa mga gilunopan nga mga barangay ug sa probinsya sa Ilocos Norte nga naigo sa bagyong Ineng.
Ang nasangpit nga financial assistance pagakuhaon gikan sa Quick Response Fund (QRF) gikan sa Calamity Fund sa lungsod sa Davao niining kasamtangang tuig.
Una na sab nga gipailalum sa state of calamity ang mga apektadong mga barangay gumikan sa nahitabong flashflood kagabii gumikan sa localized thunderstorm.
