Nanawagan ang Management Association of the Philippines (MAP) nga magpahigayon usa og serye sa konsultasyon ang gobyerno sa wala pa ipatuman ang P200 nga dugang sa adlaw-adlaw nga sweldo sa mga minimum wage earners.
Sumala sa pamahayag ni MAP President Alfredo Panlilio, kinahanglan nga dili magdali-dali ang gobyerno sa maong desisyon ug tan-awon una ang posibleng epekto niini sa ekonomiya sa nasud.
Gibutyag sa MAP nga ilang gisusuportahan ang tumong nga mapaayo ang kahimtang sa mga trabahador ug ilang pamilya, apan gusto nilang masiguro nga dili kini makadaot sa mas dako nga ekonomikanhong hulagway, ilabi na sa mga gagmay’ng negosyante.
Gi-awhag usab sa MAP ang bicameral committee nga maampingong susihon ang maong sugyot ug ikonsidera ang potensyal nga epekto niini sa mga micro, small and medium enterprises (MSMEs).
Dugang pa sa grupo, ang ugat sa problema sa Pilipinas dili lang ang ubos nga panweldo, kondili ang taas nga presyo sa mga nag-unang panginahanglanon.
Gikinahanglan sumala pa nga komprehensibo ang pagtan-aw sa isyu, dili lamang limitado sa wage hike.
Gitambagan sa MAP ang gobyerno nga timbang-timbangon ang tanang aspeto sa maong sugyot aron maprotektahan ang interes sa mga trabahante ug sa sektor sa negosyo.
