Gipahayag sa National Irrigation Administration (NIA) nga gikinahanglan niini ang halos mukabat sa P200 bilyong budget matag tuig alang sa irrigation projects niini aron maseguro ang food security sa nasud.
Gipahayag ni NIA Administrator Eddie Guillen, pagapondohan sa P200 bilyong budget ang short to long term projects sa ahensya susama sa pagmugna ug high dams, restoration projects, solar pump irrigation initiatives ug water impounding projects.
Gipahayag pa sa NIA Chief, gisugyot sa ahensya ang P200 bilyon sa Department of Budget and Management (DBM) alang sa budget sa mosunod nga tuig.
Apan gipahayag sa opisyal nga ang giaprubahan lamang sa DBM ang mukabat sa P42 bilyon gumikan sa limitading fiscal space.
Apan bisan paman niini, masaligon ang opisyal nga tabangan sa kamara ug Senado ang ahensya nga makakuha ug mas dakong alokasyon sa higayong magsugod na ang budget deliberations sa P6.352 trilyong proposal national expenditure plan.
Target sa DBM nga masubmitar sa kamara ang proposed budget sa mosunod nga tuig, usa ka semana pagkahoman sa ikatulong State of the Nation Address (SONA) ni Pangulong Ferdinand Marcos Jr. sa Hulyo 22.
