DAVAO CITY – Moabot na sa P179.45 million ang kantidad sa mga kontrabandong sigarilyo nga nasakmit sa Bureau of Customs – Port of Davao nga gipalusot sa mga pantalan sa rehiyon.
Sa gipagawas nga intelligence reports sa BOC-Port of Davao, ang nahisgutang kantidad ang gikan sa 12 ka mga operasyon sa ilang ahensiya diin tag-4 ang nakuha gikan sa mga pantalan sa davao region, sub-ports sa General Santos City ug Parang, Maguindanao.
Sa usaka pahayag, gikanayo ni BOC- Davao District Collector, Atty. Erastus Austria mipagawas na siya ug Warrants of Seizure and Detention sa nahisgutang mga kontrabando gumikan sa pagsupak sa Republic Act 10643, o ang “An Act to Effectively Instill Health Consciousness through Graphic Health Warning on Tobacco Products.” R.A. 10863 o ang Customs Modernization and Tariff Act ug uban pa.
Gipasigarbo usab sa opisyal nga ang nahisgutang kalampusan ang bunga sa ilang mas gipalig-on nga boarder protection security sa ilang mga pantalan.
Sumala pa ni Austria mas gipahugtan nila ang ilang patrol ug surveillance sa ilang X-ray Inspection Project, Customs Intelligence ug Investigation Service ug Enforcement Security Service aron masiguro nga walay makalusot nga mga kontrabando sama sa mga sigarilyo.
