DAVAO CITY – Mas mapalig-on sumala pa ang operational capability sa Philippine Air Force–Tactical Operations Wing Eastern Mindanao (PAF-TowEastMin) dungan sa pagtukod sa ilang P16-million Base Operations Building.
Sumala pa kang Major General Allen Paredes, commanding general sa Philippine Air Force, dakong tabang ang pagtukod sa gambalay aron nga mamahimong mas epektibo ang ilang pagserbisyo ilabi na ang military flight operations.
Nasayran nga ang nahisgutan nga proyekto adunay kinatibuk-ang budget nga P16,714,000 ilalom sa “DND-DPWH (Department of National Defense-Department of Public Works and Highways) Tikas Convergence Program.
Ang maong pasilidad gi-endorso sa DND ug gi-aprubahan sa DPWH.
Laoman sumala pa nga matapos ang katukuran niini sulod karong tuiga.
Una niini, nadawat sab sa nahisgutan nga ahensiya ang Security Screening Equipment (SSE) nga kantidad sa P63 million nga gidonar sa DOTr-OTS.
Usa kini ka air-conditioned facility aron nga magpabilin ang maayo nga performance ug magamit sulod sa taas-taas nga panahon.
