DAVAO CITY- Muabot sa P13.3 million nga financial assistance ang girekomenda karon sa Davao City Disaster Risk Reduction and Management Office (CDRRMO) alang sa mga lugar nga naapektohan sa mga nangaging kalamidad sama sa linog ug bagyo.
Nasayran nga ang nahisgutang kantidad ang kuhaon gikan mismo sa Quick Response Fund (QRF) ilalom sa calamity fund sa lungsod sa Davao.
Dako ang panghinaut sa nahisgutang ahensya nga gilayon kining ma-aprubahan sa Sangguniang Panlungsod sa Davao aron mamahimong makatunol ang syudad og tabang pinansyal ngadto sa mga silingang dapit.
Sumala kang Ret. Colonel Alfredo Baloran, hepe sa CDRRMO, anaa sa 27 ka mga Local Government Units (LGUs) ang nagdeklara og state of calamity sa ilang tagsa-tagsa ka mga lugar gumikan na sab sa nasinatiang kalamidad sama sa mga nangaging kusog nga bagyo ug linog ingon man lakip na sab niini ang bag-ohay lamang nahitabo nga Bagyong Paeng.
Kung ugaling maaprubahan, anaa sa P300,000 ang ihatag nga financial assistance sa mga apektadong munisipalidad samtang P500,000 sab alang sa mga apektadong syudad ug P1 million alang sa mga naapektohang probinsiya.
Kahinumduman nga naandan na sa lokal nga panggamhanan sa Davao nga maghatud gayud og tabang sa mga nagkinahanglang kasikbit nga mga lugar.
Apan bisan paman niini, gipasalig ni Baloran nga adunay igong pondo ang syudad nga mamahimong magamit kung gikinahanglan.
