Gibana-banaan nga mokabat sa P10 milyon ang kantidad sa palusot nga sigarilyo ang nakumpiska human nga nababagan sa usa ka checkpoint sa mga otoridad kagahapon sa hapon.
Subay sa report sa kapulisan, pasado ala-Una ang takna sa hapon, nababagan ang kontrabando sa Purok 27, Malagamot, Panacan, ning dakbayan sa Davao nga sakay sa wing van.
Sumala sa Regional Special Operations Group kon RSOG 11 nga nakadawat sila og report kabahin maong truck nga adunay karga nga smuggled cigarretes hinungdan nga gikasa gilayon ang operasyon.
Nasayran nga gimaneho sa usa ka alyas Ryan, 42 anyos, minyo, nga residente sa Bangkal ning dakabayn sakay ang duha ka mga kaubanan nga giila nga sila Romeo, 25 anyos, helper, taga Loreto, Agusan del Sur ug Jiacheng, 31 anyos, warehouse manager, taga Brgy. Communal, Buhangin Dist.ning syudad.
Nasayran nga mokabat sa 2milyon ka mga sticks sa sigarilyo ang nakumpiska nga gilangkuban sa 200 ka mga master cases.
Sa karon mag-atubang og kaso ang mga dinakpan sa kasong pagsupak sa R.A 10863 kon Customs Modernization and Tariff Act / Anti-Smuggling Law, R.A 10643, ug R.A 12022.
Samtang ang mga nakumpiska sumala pa nga mga palusot nga sigarilyo ang gitugyan sa Bureau of Customs ingon man ang wing van.
Samtang padayon usab ang gihimong imbistigasyon sa kapulisan aron masuta kung kinsa ang tag-iya sa mga palusot nga sigarilyo.
