DAVAO CITY – Gikalipay pag-ayo sa pamunoan sa Davao City Overland Transport Terminal (DCOTT) ang pag-apruba sa P1.9 milyon nga budget alang sa pagtukod da billeting quarter nga itukod sulod sa terminal aron adunay kapundohan ang mga sakop sa Task Force Davao (TFD) nga maoy nagpatuman ug seguridad sulod sa bisinidad.
Sumala pa kang DCOTT manager Aisa Yusop, dakong tabang ang pagpahimutang og billeting quarter alang sa mga TFD gumikan kay mamahimong makapahulay na ang uban kanila ilabi na kung peak season sa mga pasahero diin kinahanglan og dugang personahe sa Task Force Davao aron magpatuman og seguridad.
Nasayran nga sa kasamtangan, sa passenger lounge lamang magpundo ang mga personahe sa TFD kung buot una nila nga magpahulay.
Una na sab nga gibutyag ni City Transport and Traffic Management Office (CTTMO) head Dionesio Abude nga una na matud pa nga gi-aprubahan sa Supplemental Budget (SB) 2 ang igahin nga pundo alang sa pagtukod sa billeting quarter nga gama sa container van.
Sa bulan sumala pa sa Marso gikatakdang matapos ang pagtukod niini.
