DAVAO CITY – Nabalhin na matud pa karon sa Department of Social Welfare and Development Office (DSWD) Davao ang P1.5 billion ilalom sa Social Amelioration Program (SAP) ngadto sa mga siyudad ug munisipalidad sa rehiyon nga maoy mohatag usab ngadto sa mga apektadong pamilya dungan sa gipatuman nga enhanced community quarantine (ECQ) gumikan sa coronavirus disease (Covid-19).
Sumala pa kang DSWD-Davao Director Grace Subong, nga Davao region, adunay kinatibuk-ang P4.1-billion budget ang gigahin ang SAP nga gikan sa National Government.
Gisugdan sumala pa nila ang pagbalhin sa pondo sa milabay nga adlaw ug laoman nga madawat na kini sa mga local government units (LGUs) kagahapong adlawa.
Gikanayong ang unang LGUs nga nahatagan ug pundo ang gilangkuban sa Compostela, Laak, Maco, Monkayo, New Bataan, Pantukan, Magsaysay, Jose Abad Santos, Malita, Sta. Maria, Sarangani, Lupon, Taragona, Boston, Sulop, Manay, Mabini, Montevista, Asunsion, ug Banaybanay.
Gitataw ni Subong nga ang nahisgutan nga mga LGUs magsugod sa pagpang-apud-apod ug hinabang sa ilang mga constituents sulod karong semahana ilabi na nga daghanan pa gihapon nga mga residente ang nanginahanglan ug assistance sa kagamhanan karong panahon sa ECQ.
Dinhi sa dakbayan sa Davao, ang DSWD-Davao adunay cash advance nga P279,000,000.
Gitino ni Subong nga wala nila gibalhin ang pundo sa LGU ning siyudad kini tungod ang ahensiya sumala pa ang manguna sa pagpanghatag niini kaabag ang lokal nga panggamhanan.
Una na sab nga gibutyag ni Al Jay Meliton, warehouse manager sa DSWD nga okupado na sab sila karon sa pagputos ug mga pagkaon aron nga ihatag ngadto sa mga apektadong residente.
