DAVAO CITY- Gikatakda karong sunod semana molingkod na ang bag-ong napili nga hepe sa Davao City Police Office nga si P/Col.Lito Patay.
Magsugod karong Lunes ang iyahang paglingkod isip DCPO Director. Sa kasamatangan nagsilbi siya isip Chief for Operations sa Police Regional Office 11.
Una paman kini nadistino sa PRO-11, nagsilbi una kining hepe sa Tagum City ayha kini gibalhin sa kauluhan isip hepe sa Station 6, Batasan sa Quezon City ilawom sa Quezon City Police District (QCPD) niadtong panahon sa admininstrasyon ni Kanhing Pang. Rodrigo Duterte.
Samtang gibalhin sab kini sa Central Visayas isip director sa Criminal Investigation and Detection Group kon (CIDG).
Nasayran nga ubos sa iyahang pagdumala sa buhatan, gipangunahan niini ang usa ka operasyon niadtong 2019 sa online gambling operation sa Mactan, Lapu-Lapu nga miresulta sa pagkasikop sa 181 ka mga chinese national.
Samtang sa hisgutanan nga drug war sa miaging administrasyon nga giimbistigahan karon nga sumala pa adunay nahitabo Extra judicial killing, usa si Col. Patay ang bag-uhay lamang nga gipatawag sa usa ka komitiba sa KAMARA ug gipailawom kini sa pagdungog ilabi pa nga ang Station 6 sa Quezon City, atol sa iyahang paglingko adunay daghan sumala pa nga mga napatay nga mga suspetsado.
Nasayran nga migradwar si Kernel Patay sa Philippine National Police Academy kon (PNPA) CLASS of 1996 ug nadistino kini dinhi sa Davao region nga sumala pa niini atol sa pagdungog sa Kamara, halos tibuok panahon sa iyahang pagka-pulis dinhi na sa rehiyon.
Nasayrang naggikan sa probinsya sa Sequijor ang bag-ong molingkod nga hepe sa DCPO.
Una ng gipalingkod isip OIC si Deputy Regional Director for Operations sa Police Regional Office (PRO) 11 nga si Police Col. Rolindo Suguilon nga isip hulip sa gi-relieve nga City Director nga si Police Col. Richard Bad-ang gumikan sa isyu sa drugwar sa syudad nga mikalas sa pito ka kinabuhi sa mga gikaingon nga mga suspek sa pagpayuhot ug iligal nga droga.
