DAVAO CITY – Padayon karon nga nakiglambigit ang Overseas Workers Welfare Administration (Owwa)-Davao ngadto sa mga Overseas Filipino Workers (OFW) gikan dinhi sa Davao region nga apektado sa mass protests sa Hong Kong ilabi na kadtong nangayo ug assistance sa ilang buhatan.
Una ng gibutyag ni Petrona Bregado, director sa Owwa-Davao, nga andam ang ilang buhatan nga mo-assist o motabang sa Filipino workers sa Hong Kong nga apektado na sa sunod-sunod nga Hong Kong anti-extradition bill protests.
Aduna na matud pay gi-andam nga tabang ang ahensiya alang sa mga distressed workers.
Sa kasamtangan, nakatala ang Owwa-Davao registered ug kapin 200,000 ka mga miyembro nga nagtrabaho sa abroad ang gikan sa Davao Region.
Una niini, gibutyag sab sa Owwa-Davao nga nakarehistro sila ug kinatibuk-ang 1,419 welfare cases sa OFWs sa 2018 diin kadaghanan niini ang gikan sa Middle East.
