Sa pagdali nga matubag ang pagkwestyon sa Commission on Audit (COA) sa pagagasto sa P23.8 milyon nga kantidad sa confidential fund sa Office of the Vice President (OVP), misobra matud pa ang kuwestyunable ug kadudahang resibo nga isubmitar aron pangatarunganan ang gibuhat nga paggasto.
Gisubmitar sa OVP ang 158 AR aron panagatarungana ang paggasto sa confidential fund. Giangkon sa representante sa COA sa pagdungog nga si Gloria Camora nga adunay “inadvertence and typographical mistakes” nga nahimo ang mga personahe sa OVP base sa gisubmitar niining pamatuod sa paggasto.
Dugang pa ni Camora nga usa sa mga nakita ubos sa COA notice of suspension mao ang adunay pipila ka mga ARs ang gipetsahan niadtong December 2023 ug adunay uban nga walay petsa.
Wala usab nakontento si Gutierrez sa nakuha niining tubag ug gipunting ang ‘red flag’ sa COA sa mga AR sa mga giingon niining “spurious and bogus.”
Gipunting usab ni Gutierrez ang usa ka AR nga adunay petsang Nobyembre 2022 samtang ang P125 milyon nga confidential funds ang migawas niadtong Disyembre 2022.
Ang maong pondo ang gigasto sulod sa onse ka adlaw lamang niadtong isyembre 2022.
Namatikdan usab ang pagkaparehas sa penmanship ug kolor sa bolpen nga gigamit sa pagsuwat sa AR ingon man ang pagkaparehas sa pipila ka mga mipirma sama nila ni “AAS” ug “JOV” nga nakakuha og kinatibuk-ang P280,000 ug P920, 000 isip bayad sa napalit nga impormasyon sa OVP niadtong Disyembre 2022.
Ang AAR nakadawat og P60,000 niadtong Disyembre 2022, P150,000 niadtong Pebrero 2023 ug P70,000 sa ikatulong quarter sa susamang tuig. Ang JOV nakadawat og P170,000 isip “reward payment,” P250,000 alang sa “supplies” ug P500,000 alang sa “medical and food aid.”
Sa 776 ka ARs nga gisumiter, 302 ka mga ngalan ang dili mabasa ug lima ang gibalikbalik nga mga ngalan nga gigamit.
Gipangutana usab ni House Quad Comm senior Vice Chairman Romeo Acop sa ikaduhang distrito sa Antipolo City si Camora, kinsa maoy hepe sa intelligence and confidential funds audit office (ICFAO) sa COA, kon nakabantay ba siya sa pangalan nga Mary Grace Piattos sa usa sa mga AR.
Matud pa ni Acop nga Mary Grace ang kapangalan sa usa ka restaurant ug “Piattos” ang ngalan sa usa ka brand sa potato chips.
