DAVAO CITY – Bisan nga walay nadawat nga bahad ang dakbayan sa Davao gikan sa mga dautang elemento, alerto pa gihapon ang otoridad sa pagmonitor sa palibot aron masiguro nga dili makasulod ang mga nahisgutan dinhi sa siyudad.
Sumala pa kang Angel Sumagaysay head sa Public Safety and Security Command Center (PSSCC), nagpabilin karon ang high alert status sa dakbayan human ang ulahing insidente sa Isulan Sultan Kudarat diin gipabusikad ang gitanom nga bomba sa nakaparada nga motorsiklo sa public market.
Gikanayon ni Sumagaysay nga sa kasamtangan gipakatag na ang mga personahe gikan sa mga nagkadaiyang security unit ilabi na sa mga lugar nga sagad dagsaon sa mga tawo sama na lamang sa simbahan ug mga terminal.
Limitahan na lamang sab sumala pa ang mga sakyanan nga moparada sa San pedro Square aron nga mamonitor ang palibot.
Nanawagan na lamang si Sumagaysay sa publiko nga padayon ang kooperasyon sa otoridad pinaagi sa paghatag ug impormasyon batok sa mga tawo nga adunay katahapan nga lihok.
