DAVAO CITY – Nangayo og dispensa ang organizer sa 3D Drone Light Show nga si Kat Dalisay human sa pipila ka mga kakulian nga nasinatian atol sa maong gikahinaman unta nga programa sa nahitabong Araw ng Dabaw Music and Lights Festival niadtong Marso 4, 2023.
Emosyonal nga gibutyag ni Dalisay sa iyang post nga mismong siya ang naghukom nga hingpit na lamang nga dili ipadayon ang maong light show sa dihang gihatag kaniya ni Davao City Mayor Sebastian Duterte ang desisyon sa pagpahigayon niini pagbalik.
Pagpaklaro sab ni Dalisay nga nakaagi og tumang testing ang mga drones uban sa pagpanubay sa Davao City Public Safety and Security Office, ug aprubado sab ang maong aktibidad sa Civil Aviation Authority of the Philippines (CAAP).
Gipanalipdan sab ni Dalisay ang supplier sa mga drone nga Fullhouse Asia Suppliers Inc., nga usa sa pinakadako sa tibuok Asya.
Emosyonal ang organizer tungod sa mga nanggawas nga teorya mahitungod sa maong sipyat-teknikal apan buot sab nilang mahatag ang best show nga masaksihan unta sa mga Dabawenyo sa labing unang higayon.
Nanghangyo sab kini sa katawhan nga dili sawayon ang Davao City LGU nga kauban nila sa pagpreparar sa kalihukan sulod sa duha ka bulan.
Nanaad hinuon ang organizer nga maghimo og repeat show kon makahigayon.
Kahinumdumang gibatikos ang maong drone show niadtong Sabado, Marso 4, gumikan sa nahitabong signal interference sa mobile data connection gikan sa anaa sa 80,000 ka mga manan-away nga masagap sa mga drones hinungdan nga napostpone kini pagkagabii.
Dayong gianunsyo ang pag-kansela sa maong drone show niadtong Dominggo sa buntag.
via || Bombo LJF
