DAVAO CITY – Gipanaad ni Davao City Councilor Bernie Al-ag nga susihon pag-usab ang mga probisyon sa naunang ordinansa alang sa mga app-based delivery service drivers nga magkuha og business permit.
Sigun pa sa chairman sa Committee on Trade, Commerce and Industry, usa sa mga nag-unang suliran sa mga delivery riders ang mga rekisitos ug galastuhan sa pagpa-isyu og business permit.
Gipunting sab sa konsehal ang kamahinungdanon sa pagrepaso sa maong ordinansa tungod sa kakusog sab sa demand sa mga delivery riders sa kasamtangang higayon.
Samtang, naghatag sab ug komento si Councilor Al-ag mahitungod sa isyu sa sistema sa employer-employment relationship sa mga delivery apps.
Matud pa sa konsehal nga anaa sa National Labor Relations Commission ang hurisdiksyon sa maong aspeto ug panubayan sab kini sa kasamtangang konseho.
Kahinumdumang nagpasaka og kaso ang pito ka mga myembro sa Davao United Delivery Riders Association Inc. batok sa usa ka food delivery platform gumikan sa ilegal nga pagpasuspinde kanila sa kumpanya.
via || Bombo LJF
