Gikonsiderang malampuson ug hapsay sa COMELEC XI ang unang adlaw sa Oplan Baklas.
Sumala pa ni Atty. Gay Enumerables ang Assistant Regional Election Director sa COMELEC XI, miabot sa 121 ka mga national campaign materials ang nabaklas niini sa first district sa unang adlaw pa lang.
Pipila sa mga rota nga gisubay sa COMELEC XI mao ang Bangkal paingon Bypass Road, Ecoland ug diretso hangtod sa Magsaysay.
Ang mga national campaign materials nga gipangbaklas gikan sa mga undesignated area susama sa mga poste, tulunghaan, tulay ug kahoy mao una katong dunay sukod nga 2×3, diin walay kalakip usab katong mga gipangpilit ngadto sa private properties.
Apan gipaklaro usab sa opisyal nga ang pagbaklas sa mga posters dili adlaw-adlaw gumikan usab sa uban pa niining obligasyon.
Gipadangat usab ni Enumerables nga ilawom sa fair election, mamahimong magpadayon ang billboard campaign materials sa national candidates sulod sa 60 days sugod karong adlaw, diin pagkahuman niana kinahanglan na kining baklason.
Samtang ang billboard campaign materials usab sa mga local candidates dunay 30 days gikan sa Marso 28 hangtod Abril 28 ayha kini baklason.
Dugang niini, gitugot ang billboard campaign materials nga dunay usa ka kilometros ang gilay-on sa matag billboard para sa national.
Samtang, kinahanglan usab nga ang mga billboard sa local dunay gilay-on nga 500 meters sa usag usa.
