Gibutyag ni Ombudsman Jesus Crispin “Boying” Remulla nga padayong pangitaon ug mabawi sa iyang opisina ang mga giingong ill-gotten wealth nga gitaguan sa United States. Sumala pa ni Remulla, dili angay mahimong luwas nga tagoanan ang Estados Unidos alang sa mga ilegal nga kabtangan nga giingong gikan sa Pilipinas.
Gihimo niya ang maong pahayag atol sa usa ka town hall meeting human sa 7th Global Conference on Sustainable Development Goal 16 sa punong himpilan sa United Nations sa New York, apan wala kini magngalan og piho nga indibidwal o kabtangan nga target sa operasyon.Dugang pa niini, gipasiugda ni Remulla ang nagpadayong mga reporma sa Office of the Ombudsman, lakip ang digital transformation, pagpalig-on sa transparency, ug pakigtambayayong sa mga overseas Filipinos aron mas mapakusgan ang kampanya batok sa korapsyon.
Kahinumduman nga niining buwana, gipahibalo usab ni Remulla nga gipakusgan sa Ombudsman ang imbestigasyon sa mga iregularidad sa flood control projects, diin 209 ka reklamo ang anaa na sa fact-finding investigation ug upat ka kaso ang nasampa na sa korte. Sa kasamtangan, nanawagan si Remulla og mas lig-on nga internasyonal nga kooperasyon aron mapugngan ang korapsyon ug mabawi ang mga kabtangang giingong nakuha sa ilegal nga paagi.
