Gikumpirma ni Interior and Local Government Secretary Jonvic Remulla nga duha na karon ang misulay sa pagpanuhol sa iyaha ug sa igsuon niini nga si Ombudsman Jesus Crispin Remulla nga adunay kinatibuk-ang P2 bilyon, aron muhilom sa pag-imbestiga sa flood control ghost projects sa gobyerno.
Matod pa niini, ang pagsulay sa pagpanuhol ang gihimo sa emisaryo sa contractor ug incumbent congressman-contractor nga gikan sa usa ka grupong Visayas-Mindanao ug usa ka grupo sa Luzon.
Gipahayag pa ni Remulla, gusto kuno sa mga nanuhol nga tabangan sila sa kaso ug wagtangon sa listahan ug tugutan nga makapyansa sa kaso.
Apan gipahayag niini nga dili usab ang mga nahisgutan ang pwedeng arestuhon dayon gumikan kay mamahimo kini nilang ipanghimakak nga ang pagpanuhol ang nagagikan sa ilaha gumikan kay dili diretso ang gitanyag nga suhol.
Gipahayag pa ni Secretary Remulla nga gikataw-an lamang nila nga managsuon ang gitanyag nga suhol gumikan kay ingon ani diay ang pagtan-aw sa ilaha sa mga nanuhol.
