Nangandam na ang Office of Civil Defense Region XI (OCD-XI) alang sa ikaduhang hugna sa Nationwide Simultaneous Earthquake Drill nga ipahigayon karong Huwebes, Hunyo 19, isip suporta sa panawagan sa national government nga palig-onon ang kaandaman sa mga komunidad sa panahon sa katalagman.
Sumala ni OCD-XI Regional Director Ednar Dayanghirang, ang mga estudyante ang labing delikado sa panahon sa linog, busa importante nga ang tanang tunghaan, gikan sa elementarya hangtod kolehiyo nga andam sa pagbuhat sa husto nga mga lakang sa panahon sa emerhensya.
Gisulti usab ni Dayanghirang nga apil ang pribadong sektor sa kalihukan aron matudluan ug mabansay ang ilang muscle memory.
Gibutyag sab sa buhatan nga giplano nga palapdan pa ang mga programa kabahin sa earthquake preparedness, aron masiguro nga andam ang tibuok rehiyon sa bisan unsang kalit nga katalagman.
