DAVAO CITY – Nanghinaut ang Office of the Civil Defense (OCD) 11 nga unta seryosohon na sa katawhan ang matag ipahigayon nga tsunami ug earthquake drill aron nga mas masayud ang mga nahisgutan sa mga angayan nga himuon sa higayon nga adunay masinatian nga susamang kalamidad.
Kini ang gibutyag ni Francis Iraq, admin officer sa OCD 11 human ang ulahing insidente diin nagkagubot ug nagpanic ang mga tawo tungod sa sayop nga impormasyon sa tsunami alert.
Hinuon bisan nga nakadayeg ang nahisgutan kay miresponde gilayon ang mga tawo apan sayop sumala pa ang pagpakatag ug mali nga impormasyon sanglit mohatud sab kini ug negatibo nga epekto ngadto sa uban ug mamahimong mabutang sa alanganin ang sitwasyon sa katawhan.
Samtang gipasabot sa nahisgutan kung unsa ang kalahian sa magnitude ug intensity nga sagad masinatian sa higayon nga linog.
Ang magnitude nagpasabot sa kakusgon nga enerhiya ngha gibuga samtang ang intensity mao ang kadaut nga ihatud niini sa tawo ug sa mga gambalay.
