DAVAO CITY – Kabsan gilayon sa iyang kinabuhi ang usa ka kanhi miyembro sa New People’s Army (NPA) ug giilang Number 1 Most Wanted Person sa dakbayan sa Davao atol sa nahitabong shootout tali sa otoridad sa Rosalina 3, Barangay Baliok, Talomo District.
Sumala pa kang Davao City Police Office (DCPO) Director Police Colonel Alexander Tagum nga pasado alas dies kagahapon, ang mga personahe sa Tugbok Police Station ug Presidential Anti-Organize Crime Commission (PAOCC) ang naghatud sumala pa ug warrant of arrest batok sa suspetsado nga nailang si Long-Long Clarion.
Nag-atubang sumala pa ang nahisgutan ug kasong murder pinasikad sa arrest warrant nga gilagdaan ni Judge Evalyn M Arellano-Morales of Regional Trial Court (RTC) 11 sa Branch 17 ning dakbayan sa Davao. Apan miresulta sumala pa kini sa binaylo-ay ug bala nga maoy hinungdan maoy hinungdan nga kamatayon sa suspek.
Sa gihimong pagpanubay, naila ang napatay nga si alias JB, miyembro sa Pulang Bagani Command (PBC 1) sa NPA o Benjie Martos Clarion, 25 ngadto na sa 30 anyos, ulitawao ug lumad nga taga Sitio Battalion, Barangay New Carmen, Tugbok District.
Gilusad gilayon ang operasyon human nga namatikdan sumala pa ang suspek sa Talomo samtang nagpaka-arun ingnon nga sub-contractor sa housing company sa Baliok.
Narekober sa crime scene ang usa ka .38 revolver nga adunay tulo ka mga cartridges usa ka fired cartridge case nga gituohang iya sa caliber .38, usa ka fired cartridge sa 9mm, usa ka improvised 9mm nga adunay 2 ka magazine, ug 15 9mm cartridge, unom ka mga gagmay nga pakete sa ginadili nga droga, usa ka MK2 fragmentation hand grenade nga gikustodiya karon sa Explosive Ordnance Disposal (EOD), usa ka back pack nga gi-undan ug mga senina ug uban pang butang. Ayha ang operasyon, nagpahigayon sab ang otoridad ug pagpaniid sa suspek human nga nakadawat ang impormasyon ang kapulisan nga anaa sa maong area si Clarion.
