Gipatin-aw sa Simbahan sa Quiapo ang hinungdan ngano nga adunay pagtul-id sa terminong gigamit sa imahe sa Poong Jesus Nazareno.
Sa eksklusibong paghinabi sa Bombo Radyo, gibutyag ni Rev. Fr. Marion Maquiraya, Parochial Vicar ug Program Committee for Nazareno 2026, nga dili na tawgon ang imahe isip “Itim nga Nazareno.”
Sumala sa pari, ilang tumong nga mas tutukan kung kinsa ang girepresentar sa imahe ug dili ang kolor niini.
Importante, matod pa niya, nga masabtan sa mga tawo ug deboto nga si Hesus maoy ginapasalamatan ug ginadayeg.
Tungod niini, gipahibalo nga ang opisyal nga tawag sa imahe mao na ang “Nuestro Padre Jesus Nazareno.”
Samtang giangkon ni Rev. Fr. Maquiraya nga lisod pa matino kung pila ka oras molungtad ang Traslacion 2026, gumikan sa nagkalainlaing oras matag tuig, busa dili una mabutyag ang eksaktong gitas-on o kadugayon sa maong prusisyon.
Kabahin usa sa gamiton sa Poong Jesus Nazareno, gibutyag sa pari nga walay dakong kausaban nga gihimo.
Apan gihangyo niya ang publiko, ilabi na ang mga deboto, nga mosunod sa mga marshalls ug mga awtoridad nga maggiya sa sistema sa Traslacion.
Kini aron mapadayon ang kahapsay ug malikayan ang pagsugat sa mga tawo atol sa pgdagsa sa mga tawo samtang giprusisyon ang imahe.
Pahimango usab og balik sa Simbahan sa Quiapo nga likayan na ang pagsaka sa imahe sa Nazareno, aron mas makita sa tanang deboto ang Jesus Nazareno sa panahon sa prusisyon ug sa pag-agi niini sa mga rutang latason sa dakbayan sa Maynila.
