DAVAO CITY – Gipasalig sa National Telecommunication Commission XI nga taliwala pa man sa mga nasinatiang bardowns sa mga registration links tungod sa pagdagsang sa mga nagparehistro online atol sa pagsugod sa Sim Card Registration Act, aduna gihapon taas nga panahon ang katawhan nga ma-rehistro ang ilahang mga numero.
Gikanayon ni NTC 11 Regional Director Nelson Canete atol sa pakighinabi sa Bombo Radyo Davao, duna pay 180 days o unom ka bulan aron maparehistro ang SIM aron dili kini ma deactivate. Aduna na sab gihatag nga links ang mga telco companies kon asa iparehistro ang SIM ngadto sa ilang tagsa-tagsa nga mga subsribers.
Gidasig sab ni Canete ang katawhan nga hatagan og higayon nga muparehistro tungod gawas wala pay tunga sa oras, rehistrado na ang imong numero.
Hinuon gikanayon sab sa opisyal nga dili kini mandatory, apan buot hunahuon lamang nga subay sa balaod, ma deactivate ang SIM nga wala na rehistro sulod sa 180 ka adlaw.
Gawas sa online registration, itagana sab ang mga on-ground registration sa mga remote areas nga walay internet access.
Tambag ni Canete nga gamiton lamang ang mga links nga gihatag sa mga telco companies pinaagi sa text message gikan sa SMART, GLOBE ug DITO Networks.
Gitambagan usab sa buhatan ang publiko nga dili gayud muhatag og bisan unsa nga mga personal nga impormasyon pinaagi sa mga nadawat nga mga email ug text messages ug likayan ang pag pislit sa mga sayup nga links o mga URLs.
Gipasalig usab ni Canete ang katawhan nga dili angay mabalaka o mahadlok sa pagparehistro gumikan sa kahadlok nga mahilabtan ang ilang “Privacy”, tungod ang gobyerno nagsubay sab sa data privacy law nga kinahanglan respetohon ang confidentiality sa usa ka indibidwal, kondi dunay silot naghulat ngadto sa mga masinupakon.
via || Bombo HJR, Bombo LJF
