DAVAO CITY – Gi-andam na ang kasong kalapasan sa Republic 9165 kun Comprehensive dangerous drugs act of 2002 batok sa usa ka lalaki ug laing upat ka mga indibidwal nga nadakpan sa gilusad nga drug buy bust operation sa Philippine Drug Enforcement Agency (PDEA) sa Northern Plain Subdivision, Barangay Gredu, Panabo City, Davao del Norte.
Una ng nasikop ang suspek nga si Jhonel Montecillo Acero alyas Yoyo, 40 anyos, ulitawo ug residente sa nahisgutan nga lugar.
Nakuha sa posisyon niini ang kapin kun kulang 25 gramos sa gikatahapang shabu nga adunay street value nga P375,000.00 ingon man mga nagkadaiyang drug paraphernalia.
Atol sa pagpatuman sa search warrant laing upat pa ka mga bisita nga anaa sa drug den ang nadakpan nga giilang sila si Bayani Barrientos, Ranel Patris, Dean Harris Revalde, Rommely Enriquez ug Rhea Silvestre.
Nasayran nga si Acero adunay standing warrant of arrest human nga nakaikyas kini atok sa drug buy bust operation kaniadtong tuig 2012.
Giila sab ang nahisgutan isip big time nga nagapayuhot ug ginadili nga droga sa Davao del Norte.
Nagpabilin karon nga nakadetine sa Philippine Drug Enforcement Agency Regional Office XI detention facility ang mga suspek samtang ang mga illegal drugs nga narekober ang gikustodiya karon sa Laboratory Service aron nga ipailalom sa eksaminasyon.
Naghulat na lamang ang mga dinakpan nga maresolba ang kaso nga ilang gi-atubang.
