DAVAO CITY – Subling nagpaklaro ang Police Regional Office 11 mahitungod sa bag-ong mando sa nilingkod karon nga PNP Chief nga si Police General Rommel Marbil nga bawal na ang paggamit og cellphone ang mga pulis panahon sa ilahang duty hours.
Sumala kang PRO 11 Spokesperson PMaj. Catherine dela Rey, applicable lamang kini sa mga kapulisan nga nagpatrolya sa ilang tagsa-tagsa ka area of responsibility.
Dugang pa nga kon ugaling mukuha og litrato ang katawhan subay sab sa nahimong mandato sa bag-ong hepe, siguruhon ang pila ka minuto nga paggamit sa maong pulis sa iyahang cellphone panahon sa patrol duties niini aron masuta kon nagagamit kini og cellphone sa pagresponde sa usa ka emergency o di kaha sa paglingaw-lingaw pinaagi sa mobile games o social media.
Una nang gipasalig sa PRO 11 nga nagapadayon ang ilang pagbantay sa mga kaubanan ug gipaneguro nga wala kini santohon nga miyembro sa kapulisan kung masakpang nakalapas sa maong kamandoan.
Posibleng mapasakaan gilayon kini og kasong administratibo kung ugaling mapamatud-an ang dili maayong binuhatan ug lakip usab nga e-relieve sa pwesto ang supervising officer niini.
Nagtumong ang bag-ong liderato sa PNP alang sa mga kapulisan nga mahimong maayong ehemplo sa kadaghanan diin nagtumong nga mabati sa komunidad ang tinuod nga presensya nila ug aron walay babag sa pagresponde atol sa emerhensiya.
