DAVAO CITY – Girekomenda sa National Economic and Development Authority (NEDA) Investment Coordination Committee-Cabinet Committee (ICC-CabCom) sa Neda Board ang pag-apruba sa tulo ka mga nag-unang infrastructure projects alang sa dakbayan sa Davao.
Kalakip niini ang Davao City Coastal Bypass Road sa Bucana Bridge Project; nagpadayon nga Davao City Bypass Construction Project; ug unsolicited proposal alang sa Davao International Airport.
Nasayran nga ang Davao City Coastal Bypass Road sa Bucana Bridge Project ang adunay pundo nga P28.26 billion kini ilalom sa General Appropriations Act (GAA) ug Official Development Assistance (ODA).
Ang nahisgutan nga proyekto gilangkuban sa construction sa 18.21-kilometer road nga adunay upat ka lane ug speed limit nga 50 kph.
Magsugod kini sa Bago Aplaya paingon sa R. Castillo.
Samtang gi-aprubahan sab sa ICC-CabCom ang Unsolicited Proposals alang sa Davao International Airport sa Chelsea Logistics Holdings Corp., nga gipanag-iyahan sa negosyanteng si Dennis Uy.
Samtang una na sab nga gibutyag sa transportation department nga ang unsolicited proposal diin sakop ang pagpalapad sa terminal building, pagtukod sa parallel taxiway, pagpalambo sa airside ug landside facilities, installation sa modern airport IT systems, ug daghanan pa ang kinahanglan sumala pa nga palambuon aron nga makahatag og serbisyo.
Sa milabay nga Nobyembre 2019, inisyal na nga gi-aprubahan ang laing duruha ka Davao City major projects nga gilangkuban sa High Priority Bus System (HPBS) ug Davao-Samal Bridge.
