DAVAO CITY – Magpadayon sumala pa ang National Bureau of Investigation (NBI) ug Criminal Investigation and Detection Group (CIDG) sa pagsilbi sa search warrant nga gipagula sa Regional Trial Court (RTC) Branch 20, Court of Manila batok sa mga fast money ug investment schemes sa rehiyon.
Kahinumduman nga girumbo kagahapon sa otoridad ang buhatan sa Rigen Marketing sa rehiyon kalakip na ang sa Tagum City diin narekober nila ang pipila ka mga ebidensiya.
Human gisilbi ang warrant, temporaryo nga pasirad-an una ang Rigen Marketing hangtud nga ma-comply niini ang gikinahanglan nga mga rekisitos nga gipangayo sa kagamhanan.
Una na sab nga nagpahigayon ug operasyon ang CIDG-Davao City Field Unit (DCFU) batok sa Organico Agribusiness Venture nga nahimutang sa Bolton Street ning siyudad.
Sumala pa kang CIDG-DCFU head Police Major Milgrace Cajes Driz, istrikto nila nga ginapatuman ang operasyon sa higayon nga madawat na nila ang search warrant.
Kauban nila sa gipahigayon nga raid si Securities and Exchange Commission (SEC) atty. Oliver Leonardo mga sakop sa barangay officials ug media.
Sa kasamtangan, gi-andam na sa otoridad ang mga ebidensiya nga gipangayo batok Organico aron nga ila kining isumite sa national office. Gikanayong magpadayon ang operasyon sa otoridad hangtud ugmang adlawa, Hunyo 13.
