Giawhag sa National Bureau of Investigation (NBI) si suspended Bamban,Tarlac Mayor Alice Guo nga mo-surrender na sa awtoridad.
Dugang gipahayag ni NBI Director Jaime Santiago nga mamahimo usab mo-surrender si Guo sa Senado ug motambong sa gihimong pagdungog sa kaso niini.
Gikanayon pa sa NBI Director nga walay problema nga dili masulbad ug ang tanan mahan-ay. Nagpagawas sa nahisgutang panawagan si Santiago homan sa hulga ni Senator Jinggoy Estrada nga paubsan ang 2025 budget sa NBI ug Philippine National Police (PNP) sa higayong mapakyas sila maaresto si Guo.
Gipahayag pa ni Santiago nga bisan nagpagawas ang Senado ug arrest order batok kang Guo gumikan sa wala pagtambong niini sa pagdungog nga adunay kalabutan sa illegal Philippine Offshore Gaming Operators (POGO), wala pay napasakang kaso batok sa nahisgutan.
Apan bisan paman niini, nag-atubang ug reklamo ang suspended mayor ug human trafficking sa Department of Justice nga adunay kalabutan sa gironda nga POGO hub sa lugar niini.
Gikwestyon usab ang citizenship gumikan sa dili magkatugmang testimonya sa iyahang background ug makadudahang dokumento sa pagkatawo niini.
Gipahayag pa sa tinubdan walay nadawat ang NBI ug bisan unsang feelers sa pag-surrender ni Guo.
Kung kahinumduman, gipahayag sa NBI nga adunay nakakita kang Guo sa Bulacan sa wala pa gipagawas ang arrest order batok kaniya.
Samtang Office of the Solicitor General ang nagpasaka ug quo warranto petition batok kang Guo, nga mamahimong muresulta sa pagkatanggal niini isip mayor.
