Abri si National Bureau of Investigation (NBI) Director Jaime Santiago sa posibilidad nga mogamit sa tabang gikan sa International Criminal Police Organization (Interpol) aron madakpan ang mga Filipino content creator nga anaa sa laing nasod nga giakusahan sa pagpakataog og disinformation.
Taliwala sa nagpadayon nga imbestigasyon sa NBI sa mga vlogger nga giakusahan sa pagpakatag og peke nga balita, gipasabot ni Santiago nga patas ug husto ang proseso sa pagpangayo og tabang sa Interpol aron ma-extradite ang mga Pilipinong vlogger nga nakalapas sa balaod ug nagpuyo sa gawas sa nasod.
Gibuhat ni Santiago ang maong pahayag usa ka adlaw human niyang ibutyag nga natumbok na ug kasamtangang ginabantayan sa NBI ang kapin sa 20 ka mga vlogger nga gidudahang nagapakatag og sayop nga impormasyon.
Gibutyag sa NBI chief ang mga hagit sa hurisdiksyon sa pagpangita sa mga indibidwal nga anaa sa laing nasod, ilabi na sa Estados Unidos diin ang libel wala giisip nga usa ka krimen.
Tungod niini, matod ni Santiago, gitan-aw na sa NBI ang lain-laing legal nga pamaagi, lakip ang posibleng mga kaso nga inciting to sedition ug tax evasion.
Ang pagsaka sa gidaghanon sa mga online content creator nga gigukod ilawom sa administrasyon ni Pangulong Ferdinand Marcos Jr. nahitabo taliwala sa nagkainit nga tensyon tali sa iyahang pamilya ug sa mga Duterte, ilabi na sa kanhing Pangulo nga gi-aresto ug kasamtangang anaa sa kustodiya sa International Criminal Court.
