DAVAO DE ORO- Miabot na sa 40 ka mga balay ang natukod sa Bayanihan Village, Brgy. Panibasan, Maco Davao de Oro.
Sa pinakaulahing update, katunga na sa laraw nga 80 ka mga kabalayan ang napatukod pinaagi na usab sa pagtinabangay sa mga opisyal ug katawhan sa maong lugar.
Kahinumduman gipaningkamutan nga mapatukod ang Bayanihan Village sulod lamang sa duha ka bulan aron gilayon kining magamit sa mga biktima sa pagdahili sa yuta.
Nagsugod ang konstruksyon sa maong mga kabalayan kaniadtong Hulyo 7 ug ning kasamtangan padayon ang progress niini.
Sumala pa ni Governor Tyron Uy, gikalipay niya ang layo na nga naabtan sa maong lakang uban ang pagpadayag og pasalamat sa mga opisyal, donors, stakeholders, ug residente nga wala niundang sa pagtabang ug pagsuporta sa katukoran sa Bayanihan Village.
Dugang pa niini nga bisan paman layo pa kini sa kamatuoran, mahinungdanonn gihapong ipasigarbo ang hinay-hinay nga kalamboan niini nga nagsugod lamang sa usa ka panghinaot.
Ang maong mga kabalayan ang ipanghatag sa mga nabiktima sa pagdahili sa yuta sa Masara Landslide kaniadtong bulan sa Pebrero tuig 2024.
