Gibutyag ni National Police Commission (Napolcom) Vice Chairman ug Executive Officer Atty. Rafael Calinisan nga adunay duha ka grupo nga misulay og pag-impluwensya kanila aron malihis ang imbestigasyon kalabot sa pagkalambigit sa 12 ka aktibong pulis sa kaso sa nahanaw nga sabungero.
Gipasalig ni Calinisan sa publiko nga ilang ginapatuman ang usa ka patas ug walay gidapigan nga imbestigasyon.
Matod pa niya, ang usa sa mga grupo mao ang giingong “big boss” sa sabong, samtang ang usa pa mao ang grupo sa mga local government executives.
Dugang pa ni Calinisan, adunay usa ka kanhing opisyal sa gobyerno nga gustong limpyohan ang pangalan sa pipila sa mga pulis, apan iya kining gibabagan.
Gikanayon usab sa opisyal nga hugot ang mando ni Pangulong Ferdinand Marcos Jr. nga walay itagong impormasyon o protektahan nga nalambigit sa kaso.
Gipaklaro ni Calinisan nga dili sila magpailawom sa bisan unsang impluwensya ug wala silay kahadlokan ni atrasan sa pagpadayon sa ilang imbestigasyon.
