Ipailawom sa surgical operation ang usa ka lalaki nga gipusil sa iyahang kainom tungod sa pagsulti nga dili kini madutlan tungod bullet proof sumala pa ang iyahang lawas.
Subay sa report sa kapulisan, giila ang biktima nga si Victor Oclida Hernale, 50 anyos, minyo, laborer nga residente sa nasampit nga lugar diin pasado 12:00 ang takna kaganihang kaadlawon nahitabo ang pagpamusil sa Brgy. Acacia, Buhangin District ning dakbayan.
Subay sa gihimong imbistigasyon sa kapulisan, nag-inom ang biktima uban sa iyahang higala nga mao ang suspek nga si alyas Roland, nga puros mga residente sa Purok New Visayas.
Sumala pa sa mga otoridad, gihagit sa biktima ang suspek nga pusilon kini tungod dili siya madutlan og bala gumikan bullet proof sumala pa ang iyahang lawas.
Tungod sa iyahang pagpanghambog sa suspek, gilayon kini nga gipusil sa tuo nga bahin sa iyahang tuhod, kaduha ka higayon nga maoy nahimong hinungdan sa iyahang pagkalup-og.
Human sa maong panghitabo dali nga misibat ang suspetsado sa wala matino nga direksyon.
Hinoon, gilayong nadakpan ang suspek human kining boluntaryong mitahan ug kasong frustrated murder ang atubangon sa maong suspetsado.
