DAVAO CITY – Hingpit na nga gipalig-on ang pagpasaka ug kaso batok sa usa ka lalaki nga nasikop human nga nangawat ug pantalon sa usa ka tindahan sa Uyanguren ning siyudad.
Gipasakahan ni Prosecutor Irene Joy Tala-Montero ang suspek nga si Adrian Secriss Cuevos ug kasong theft.
Nadakpan si Cuevos human nga nakuha sa posisyon niini ang Zen Performance Pants diin miadto sumala pa kini sa fitting room ug gisuot ang kinawat nga pantalon.
Gipanid-an sumala pa ang nahisgutan hangtud nga mikuha na sab kini ug lain pa nga pantalon nga iyang gisulod sa iyang dala nga sling bag.
Gisundan sumala pa si Cuevas sa security guard hangtud nga migawas kini sa tindahan nga wala gibayaran ang iyang gikuha nga items.
Dihang gipangayuan kini ug resibo, wala sumala pay mapakita ang suspek sa iyang gipangkawat nga pantalon nga mobalor sa P1,997.
Subay sa resolusyon ni Montero nga gi-aprubahan ni Prosecutor Maria Gemma P. Dabbay-Tambis, sad-an sumala pa si Cuevos sa reklamo nga giduso batok kaniya.
