Nakaangkon ug mga samad pinusilan sa iyahang kalawasan ang usa ka Delivery Rider human nga gisulayan og tulis sa mga nakamotorsiklo kagahapon sa hapon sa Carmen, Davao Del Norte.
Subay sa report gikan sa kapulisan, nahitabo unta ang pagpanulis sa Purok 6B, Brgy. Sto. Niño, sa nasampit nga munisipalidad pasado alas Dos sa hapon.
Subay sa inisyal nga imbestigasyon sa Carmen Municipal Police Station, ang biktima giila nga usa ka 22 anyos, ulitawo, J&T delivery rider, ug residente sa Purok 5, Brgy. Tuganay, Carmen, Davao del Norte.
Nasayran nga padulong unta sa paghatod og usa ka parcel ang biktima sakay sa motorsiklo, apan pag-abot sa lugar nga nahitaboan, kalit sumala pa nga mibut-ho ang duha ka mga sakay sa ladies-type nga motorsiklo nga naka-bonnet nga misulay sa pagpahunong kaniya.
Apan nakabantay na ang biktima hinungdan nga gipaspasan niini ang pagpadagan sumala pa sa iyahang motosrsiklo nga maoy hinungdan nga gipusil kini sa wala mailhing mga suspetsado.
Sumala pa, dali nga misibat ang mga suspek human nga wala molampos sa ilahang pagpanulis.
Samtang ang biktima dali nga midangop sa Gaviola Hospital alang sa pagpatambal sa samad nga iyahang nahi-aguman.
Sa pagkakaron, gipahigayon na sa kapulisan ang imbistigasyon ingon man hot pursuit operation aron matunbok ang mga suspetsado.
