DAVAO REGION- Naangkon sumala pa sa nag-inusarang mananaya sa probinsya sa Davao del Sur ang dakong premyo ug kini ang kalit nga nahimong milyunaryo human nga natagnaan ang unom ka mga kombinasyon sa numero niadtong Hwebes sa gabii nga draw sa Super Lotto 6/49 jackpot.
Subay sa advisory nga gipaguwa sa Philippine Charity Sweepstakes Office ang winning combination number mao ang 41-33-31-24-37-49 nga adunay premyo nga P157,395,155.60.
Ang maong ticket ang napalit sa Suyo, Thelma T. Rizal Avenue, Digos City, Davao del Sur.
Subay sa Republic Act 1169, kon balaod sa PCSO lotteries, ang mga mananaog adunay usa ka tuig nga lugway aron sa pagkuha sa premyo.
Tanang mga jackpot prizes ang gikinahanglan nga makuha sa PCSO main office sa Shaw Boulevard, Mandaluyong City.
Tanang modaog sa Lotto nga molabaw sa P10,000 ang adunay 20-percent nga buhis ilawom sa Tax Reform for Acceleration and Inclusion Law.
Samtang sa laing bahin, adunay baynte sab ka mga tayador ang makadawat ug premyo nga P50,000 matag usa tungod natagnaan ang lima sa unom ka mga winning digits; Samtang 1,110 ang makadawat ug P1,200 matag usa nga nakatagna sa 4 digits; ug 22,274 ang makakuha ug P50 matag usa tungod 3 correct digits.
Ang Super Lotto 6/49 ang ipahigayon matag Martes, Hwebes, ug Dominggo.
