Misaka na sa siyam ka tawo ang patay gumikan sa paghapak ni bagyong Carina. Matod pa sa National Disaster Risk Reduction and Management Council (NDRRMC) nga adunay duha usab ang nasamdan ug usa ang gika-report nga missing.
Ang mga nangamatay ang nagagikan sa Zamboanga Peninsula nga adunay upat, duha sa Bangsamoro Autonomous Region in Muslim Mindanao (BARMM) tag-usa sa Northern Mindanao ug Davao Region. Samtang usa usab ka batan-on ang nakaplagang patay homan kini nalumos sa sapa sa Infanta Bridge sa Barangay 96 sa Tondo, Maynila.
Naapektuhan usab ang mukabat sa 179,744 ka mga pamilya sa nahisgutang bagyo o katugbang sa 866,483 ka mga indibiduwal.
Samtang gibana-banaan usab nga mukabat sa P8.7 milyon ang damyos sa agrikultura sa Western Visayas, Zamboanga Peninsula, Northern Mindanao ug BARMM samtang ang damyos sa mga inprastraktura ang anaa sa P700,000 gawas pa sa mga damyos sa mga kabalayan nga anaa sa P2.5 milyon.
Dugang pa sa NDRRMC, ang southwest monsoon mao ang nagdala sa grabeng pag-ulan sa nagkadaiyang bahin sa nasud sukad pa niadtong Hulyo 11 ug gipakusgan pa sa bagyong Butchoy ug Carina.
Samtang nanghatag na usab ang Department of Social Welfare and Development (DSWD) ug mubalor sa P29 milyon nga hinabang sa gipabalhin nga mga apektadong pamilya.
