Gipadayag ni Police Regional Office (PRO) 11 Director Police Brigadier General Leon Victor Rosete nga paimbistigahan ang pipila ka mga indibidwal ug posibling mapasakahan ug kaso kung mapamatud-an gumikan sa pagpakatag og sayop nga mga balita kon “fake news”.
Sumala pa sa opisyal nga dili niini palabyon ang gihimomg pagpakatag og sayop nga impormasyon nga nakahatod og kabalaka, kasamok ingon man pagdagsa sa mga dumadapig sa kanhing Pangulo bisan og walay kamatuoran ang maong mga impormasyon.
Kahinumduman nga miguwa ang balita sa social media ug nanawagan nga adunay mahitabo sumala pa nga raid sa panimalay sa kanhing Pangulo hinungdan nga dali usab nga midagsa ang mga supporters sa kanhing Pangulo sa panimalay niini sa Doña Luisa Subdivision, Ecoland, niadtong Myerkules sa gabii, gumikan sa mga taho nga niabot sumala pa ang mga personahe sa Criminal Investigation and Detection Group kon (CIDG) ug ang Special Action Force (SAF) dinhi sa dakbayan sa Davao.
Samtang gipaklaro usab sa opisyal nga walay search warrant ang kapulisan batok sa mga panimalay sa kanhing Pangulo. Giklaro usab niini nga wala silay nadawat nga koordinasyon gikan sa CIDG. Gipasalig usab ni Rosete nga walay mahitabo nga pag-raid karon ug paghuman sa pinili-ay.
