DAVAO CITY – Nahimong hagit sa nag-inusara nga survivor sa landslide sa Purok Bulawanon, Barangay Tandik, Maragusan, Compostela Valley Province na si Irvin Magallanes, dies anyos, kung unsa na’y dangatan sa kinabuhi karon nga wala na ang iyang mga ginikanan ug mga igsuon niini.
Sumala pa kang Irvin nga naka-survive siya gumikan kay sa tiilan siya natulog ug dihang nahugno ug midahili ang bukid nga anaa sa likod sa ilang balay direkta kini nga mitam-ok sa iyang mga ginikanan ug mga igsuon.
Duha ka mga tabla nga mitabon kaniya ang nahimong panagang sa biktima ug wala napurohan sa mga yuta ug mga bato nga mitabon sa ilang balay.
Nabati pa niya ang hilak sa iyang igsuon dihang natabonan sila sa nahugno nga bukid 8:30 sa gabii niadtong Dominggo.
Sa nahisgutan nga landslide patay ang iyang mga ginikanan nga sila si Ramon Magallanes, 29 anyos ug Rowena Magallanes, 30 anyos ug mga manghud nga sila si Hazel, tulo ka tuig pa lamang ug ang ilang kamanghuran nga si Joey, usa ka tuig pa lamang.
Halos mga duha ka oras ayha naugkat ang patay nga lawas sa mga biktima pinaagi sa mga mi-reponde nga mga silingan ug mga rescuers.
