DAVAO CITY – Malampusong na-rescue ang tulo ka mga mangingisda nga natanggung sa nitirik nilang bangka sa Malita, Davao Occidental.
Giila sa Philippine Coast Guard Substation Malita ug mga MDRRMOs sa Malita ug Sta. Maria ang tulo ka mga sakay nga sila Ryan Estremos, 47 anyos; Antonio Arnado, 51 anyos; ug Joey Ynot, 36 years, puros residente sa Sta. Maria, Davao Occidental.
Sumala sa report, nakadawat ug impormasyon ang Coast Guard Malita gikan sa MDRRMO Sta. Maria nga dunay duha ka bangka nga hapit nang malubog tungod sa kusog nga hangin ug balud.
Naglusad dayon ug search and rescue operations ang mga otoridad ug naplagan nila ang mga mangingisda 10 nautical miles ang gilay-on gikan sa Barangay Tubalan, Malita.
Anaa na sa maayong kahimtang ang mga nasalbar nga gidala dayon sa ilang mga pamilya.
via || Bombo LJF
