DAVAO DEL SUR – Gianunsyo sa Davao del Sur Tourism Development and Culture Promotions Center nga temporaryo unang pagasirad-an sa publiko ang Mt. Apo sugod kagahapon Hunyo 1 hangtud Agosto 31. Sumala sa ahenya, gikinahanglan kining maong panahon alang sa tinuig nga rehabilitation sa lugar.
Sa maong pahinumdom, nangayo og pagsabot ang lokal nga panggamhanan sa katawhan nga kon mamahimo nga hatagan og panahon ang pinakataas nga buntod sa nasud nga muyabong pag-usab sa panahon sa rehabilitation.
Kahinumduman nga unang gipasuspinde ang trekking ug camping activities sa Mt. Apo Natural Park gumikan sa mga nasinatiang wild fires niadtong El Nino phenomenon.
Sa pikas bahin, nagpagawas og cease-and-desist order ang Department of Environment and Natural Resources-Protected Area Management Office kon DENR-PAMO batok sa siyam ka mga entrador sa Strict Protection Zone (SPZ) sa Natural Park.
Giluwatan ang maong kamandoan giluwatan human sa imbestigasyon ug inspeksyon sa nagkalain-laing ahensya, lakip ang MANP-Pamo, Park Rangers, Bantay Bukid, ug Barangay Indigenous Peoples Mandatory Representative (IPMR).
Gisagop sa Barangay Tagurano, Davao City ang maong kamandoan nga temporaryong gisirad-an ang kabukiran sa maong dapit.
Gihatagan og gibug-aton sa barangay ang panginahanglan alang sa rehabilitasyon ug bantayan ang lugar kung adunay mga malapason.
