Gikustudiya na sa kapulisan ang usa ka motorsiklo nga giabandona sa daplin sa National Highway, sa Brgy. Sinawilan, dakbayan sa Digos niadtong hapon sa adlaw nga Hwebes.
Subay sa report sa kapulisan, pasado alas-3:00 sa hapon, nakadawat sumala pa sila og tawag gikan sa lumlupyo nga aduna matud pay usa ka motorsiklo nga gituohang gibiyaan lamang sa daplin sa nasampit nga lugar.
Gilayon nga giberipika ang impormasyon ug nasuta nga positibo nga anaa sa maong dapit ang usa ka motorsiklo nga gibilin.
Ang gibiyaang motorsiklo giila nga Suzuki Raider 150, kolor garing, adunay plaka nga L351QC ug engine number CGA1-812451 ug chassis number DL11A-139729.
Sumala sa unang imbestigasyon, nasayran nga una na kining namatikdan sa mga residente niadtong Enero 13, sa buntag sa maong lugar. Niadtong higayuna sumala pa, wala kini tagda sa mga residente gumikan sa ilahang pagtuo nga kuhaon lamang sa tag-iya.
Apan hangtod sa Enero 15, 2026, walay bisan kinsa nga mipakita aron kuhaon ang motorsiklo, hinungdan nga napugos ang mga residente sa pagreport niini sa kapulisan.
Mahitnugod niini, nanawagan karon ang kapulisan sa Digos sa tga-iya nga makig-alayon sa ilahang buhatan.
Gnasubay na usab sa mga otoridad ang maong motor kon kini ba ang gikarnap o igo lamang gibilin sa maong dapit.
