Mosobra kuno sa katunga sa populasyon sa nasud nga anaa sa insaktong pangidaron nga mga Pilipino, ang dili pabor nga himuong legal ang diborsyo sa Pilipinas, matod pa sa survey nga gihimo sa OCTA Research.
Ang nahisgutang survey gihimo sukad sa Hunyo 26 hangtod sa Hulyo 1, ning tuig kasamtangan ang nagpakita nga 57% sa mga anaa sa insaktong pangidaron nga Pilipino ang wala misuporta sa pagpasa sa balaod aron himuong legal ang diborsyo sa nasud.
Gipahayag pa sa OCTA nga ang June 2024 figure ang nagpakita ug 6% nga pagtaas gikan sa 51% nga gikatala sa ikatulong quarter sa tuig 2023. Samtang mukabat sa 39% ang mipabor sa legalisasyon sa diborsyo, adunay gamay nga pag-ubos ug 2% gikan sa nakalabay nga survey.
Upat ka porsyento sa mga respondents ang wala nakahukom sa nahisgutang hisgutanan.
Sa ubang lugar ang Luzon ang adunay pinakataas nga porsyento nga dili pabor nga himuong legal ang diborsyo nga anaa sa 61%.
Nasayran usab sa survey nga mukabat sa 55% sa mga anaa sa insaktong pangidaron ang dili mobotar sa usa ka kandidato nga misuporta sa legalisasyon sa diborsyo sa nasud, samtang 39% lamang ang mobotar sa nahisgutang kandidato.
Alang usab sa mga misuporta sa pag-legalize sa diborsyo ang anaa sa 94% nga mi-uyon nga ang magti-ayon nga dili na mamahimong magkasinabot ang gikinahanglang tugutang magdiborsyo aron legal sila nga subling magpakasal.
Mukabat sa 95% sa mga pabor nga himuong legal ang diborsyo, mipabor usab nga gikinahanglang magamit sa mga asawa nga gi-abuso.
Gipahigayon ang nahisgutang survey sa 1,200 ka mga respondents ginamit ang face to face nga pakighinabi.
