DAVAO CITY – Lauman nga pakusgan pa sa Task Force Davao ang ilang hugot nga pagpanubay sa mga nagasulod nga mga ilegal nga sigarilyo dinhi sa Davao City.
Sa ekslusibong pakighinabi sa Bombo Radyo Davao, gibutyag ni Task Force Davao commander Lieutnant Colonel Darren Comia nga kasagaran sa mga nakumpiskang mga sigarilyo, nagagikan sa laing nasud ug gipalusot sa Cotabato ug Central Mindanao paingon sa Davao City.
Dugang pa sa komadante, nahimong dagkong tabang ang gipapatuman nga culture of security aron napugngan ang pagpasulod ug mga kontrabando dinhi sa dakbayan.
Nahimo sab nga kaabag sa maong kampanya ang Bureau of Customs nga nagadumala sa pagpahawan sa mga smuggled nga sigarilyo ug uban pang kontrabando aron dili na kini mapahimuslan pa sa kadaghanan.
Dugang pa ni Comia, dagko ang mamahimong epekto sa ekonomiya sa dakbayan ang pagpasulog sa mga kontrabando tungod dili bayad ang buwis niini.
Kahinundumang sa unang bahin sa tuig 2023, nakasignit na ang Task Force Davao og dul-ang nasa P4 million pesos nga kantidad sa mga smuggled nga sigarilyo.
Una nang nakumpiska kaniadtong Enero ang nasa P700,000 nga kantidad sa mga smuggled cigarette sa Toril.
Bag-uhay lamang sab nasignit sa kasaundaluhan ang nasa P2.9 million nga kantidad sa mga smuggled cigarette sa Sirawan checkpoint, Toril ning dakbayan.
Gipangkasuhan na sab ang mga responsable og kalapasan sa Republic Act 10863 kon Act Modernizing the Customs and Tariff Administration.
via || Bombo LJF
